بلاى ستيشن ٤ ولا أكس بوكس وان

ايه الافضل بلاي ستيشن ٤ ولا اكس بوكس وان

مبدئيا رغم المنافسه الشرسة بين الشركتين وان لكل منصة مميزات مش موجوده في الاخري وانحياز ملايين المستخدمين لمنصة علي حساب الاخري الا ان لسه  في ناس كتير جدا بتتردد في انها تختار انهي منصة هنحاول في المقال اننا نساعد الناس في اتخاذ قرار باننا نعرض التفاصيل المهمه اللي بتساعد في تحديد وجهتك كمستخدم..لو انت متردد اقرأ الكلام بتأني لعله يعود بفايدة ويساعدك ولو انت منحاز لمنصة معينه بناءا علي راحتك فرجاء تقراء المقال بنظرة حيادية مجرده من اي افترضات سابقة

أولاً: السعر

خلينا نبتدي باكتر نقطة بتيجي في المقدمة وهي الاسعار وانها احيانا تكون عامل مؤثر في الاختيار بين المنصتين بس الحقيقة ان في المقارنة هنا مش هتكون مؤثره اوي لان من خلال المتابعة لاسعار السوق هتلاقي ان الفرق بين سعر البلاي ستيشن 4 ولا الاكس بوكس مش كبير وبيكون في تقارب جدا في الاسعار وبيختلف من منطقة الي اخري وقبل ما تشتري وانت بتسأل علي الاسعار هتتأكد بنفسك وهتعرف ان الفرق قليل فنصيحة متخليش السعر يوجهك الي منصة علي حساب اخري لان في حاجات تانيه اهم المفروض تكون سبب تفضيلك لاي واحده منهم وهنتكلم فيها في النقط القادمة

ثانياً: الألعاب الحصرية

انا لو هشتري منصة اول حاجه هفكر فيها الالعاب الحصرية اللي بتوفرها المنصة.. المنصتين مختلفين كليا عن بعض فانت محتاج تحدد انت بتميل لايه بالضبط عشان تعرف تتجه ليه للبلاي ستيشن 4 مكتبة العاب مكونة من 1528 لعبه وده عدد مش قليل من الالعاب اما الالعاب الحصرية فهي مجموعة قوية جدا من الالعاب ومحققه نجاح كبير بين كل المستخدمين بمختلف اعمارهم ومن الالعاب دي 

Uncharted 4 - God Of War - Detroit: Become Human - Shadow of the Colossus - Horizon Zero Dawn  - Spider Man

والاكس بوكس وان مكتبة العاب مكونة من 1740  وده عدد اكبر من البلاي ستيشن 4 اما الالعاب الحصرية هي مجموعة قوية  ومحققه نجاح كبير عند عدد مش قليل من المستخدمين

Forza Horizon 4 - Quantum Break - Player Unknown’s Battlegrounds - Forza Motorsport 7 - Gears of War 4

دي بعض الالعاب الحصرية للمنصتين وبرضو مننساش ان في العاب كتير بتدعم المنصتين والالعاب دي كافيه تغير رايك في اي منصه بس الافضليه هنا فهي للبلاي ستيشن لتنوع وقوة وعدد الالعاب اللي بيقدمها

ثالثا: قوة الاداء او المعالج

البلاي ستيشن 4 : معالج ثماني النواه بسرعة 2.13 غيغا هيرتز وذاكرة وصول عشوائي قدرها 8 جيجابايت ويمتلك معالج رسومات بقوة 1.84 تيرافلوب من تصنيعAMD Radon بدقة 1080 بيكسل الاكس بوكس وان اكس: ثماني النواه بسرعة 2.3 غيغا هيرتز وذاكرة وصول عشوائي قدرها 8 جيجابايت900 بيكسل على إكس بوكس وان.. ويمتلك نفس المعالج الرسومات لكن بقوة 1.31 تيرافلوب وبدقة 900 بيكسل

رابعا:التوافق مع الاجيال السابقه

البلاي ستيشن 4 للاسف مش بيوفر النقطة دي بشكل قوي يعني انت عشان تلعب اي لعبة من العاب المنصة السابقه ال3 بيكون من خلال خدمه اسمها بى أس ناو ودي خدمة مدفوعة وعشان كده محققتيش نجاح كبير

علي العكس تماما الاكس بوكس بيقدم اكتر من 200 لعبة  وبيتم التدعيم بشكل دوري من المنصه السابقه الاكس بوكس 360

خامسا: المزايا الاضافيه - الترفيهيه

الاكس بوكس بيتفوق في النقطة بمعني الكلمة يوفرلك تجربة شامله من التطبيقات والبث المرئي والوصول الفوري للموسيقي والافلام علي النقيض البلاي ستيشن بتقتصر خدماته علي الالعاب بصورة اساسيه  وبيوفر محتوي ترفيهي من وقت لاخر 

سادسا الواقع الافتراضي

منصة بلاي ستيشن 4 هي الوحيدة بين منصات الألعاب المنزلية الحالية الداعمة لألعاب الواقع الافتراضي، وتقريبا مايكروسوفت لا تخطط لدعم الواقع الافتراضي في وقت قريب.

 اخيرا وليس اخرا  كل المقال ده مش معناه ان في منصة كويسه والتانيه وحشه الموضوع نسبي وبيختلف من شخص لاخر وبيحدده ميول كل شخص وجزء من عاطفته انت بتشتري شئ  بيوفرلك جزء ضئيل من سعادتك وبيكون وسيلة ترفيه ليك كل منصة ليها ملايين المستخدمين حول العالم وكل مستخدم شايف انها الافضل طبقا لراحته وعاطفته فكل اللي مطلوب منك كشخص بيدور علي جهاز يشتريه انك تدي نفسك وقت كافي وتفكر وتحدد ميولك واتجاهاتك اللي في الغالب بيحددها الالعاب الحصرية ومكتبة الالعاب وعشان تقدر تشتري المنصه اللي هتوفرلك وسيلة ترفهيك وسعادتك وخليك فاهم ان الشركتين المصنعيين سوا سوني او مايكروسوفت المنافسه بينهم شرسه جدا وده في صالحك انت لانه بيفرض عليهم انهم دايما يحاولوه يصلحوه الأخطاء وتحسين الأداء وتلبية تطلعات المستخدمين بطريقة سريعة وفعالة

نتمني نكون قدرنا نساعد حضراتكم واننا نكون عند حسن ظنكم دائما 

الله الموفق والمستعان

لعب ممتع للجميع

* كل الماركات وأسماء المنتجات التى تذكر على موقع إيجى نيوتك هى علامات تجاريه مملوكه لأصحابها ويكون اسم المصنع مذكور فى كل صفحه منتج, وأصحاب هذه العلامات التجاريه لهم كل الحقوق محفوظه. كل الرموز والسمعيات والبصريات داخل المنتجات التى تقوم ببيعها إيجى نيو تك هى مملوكه لمصنيعها ولهم كل الحقوق محفوظه.